iGardener 老師天天寫，日日做「停課不停學」，禮拜六日，本想歇一歇，寫吓其他課題，減下壓，怎知今天下午 WhatsApp 又再被 zoom.us 「免 40 分鐘喜訊 」 而洗版，感受到香港的同工那股望川秋水，喜出望外之情。
既然咁高興，今天決定破戒，一天出第二稿，賀吓同工們終於等到。
二月以來，直播課堂已成為香港學生的突然其來的「另類學習」，社會一齊見證長官所說的電子學習及停課不停學的成果：
二月以來，直播教學亦成為香港老師的熱薯，坊間的 理性討論 已可知一二。
關於直播方案，不少「冷氣領導」唔知有無諗清楚校情及財政預算（大學買得起，唔代表中小學買得起），見 WhatsApp 群組內啲行家話 zoom 正，就「人zoom 我又 zoom 」，肯聽 IT 同工建議嘅校本選擇，係值得景仰嘅少數領導。
IT 同工又有好多不同平台想玩，須知道今次停課，全校每一個環節都要靠 IT，唔係講玩，一月尾又無充足準備（人地梳打埠一早停課啦），明明全校已有基建的「 Google Suite 嘅 Meet 」 或 「Microsft O365 嘅 Teams 」唔去用，偏偏跟大隊用 Zoom，用用吓有啲更受傳媒青睞：
iGardener老師從不否定 Zoom 功能多多，老師乜都可以控制（即係當電腦室啲控制系統咁用囉），現實係，zoom 逐樣功能同學校計錢，正如「人人都知 Benz 係好車，點解我揸韓國車？」。
Meet 和 Teams 都係免費，唔用，唔明啲決策者寧願犧牲「學生身份認證」及甘心忍受「限時限刻40分」，死心塌地，祈求天父做十分鐘好人，求 zoom.us 免 40分鐘時限，成件事，係咪有點「洪七公」？
睇下片輕鬆下先，以下就是「視像會議」真人版，很好笑！
諷刺的，這是 zoom 幾年前的廣告。
同工可能覺得 iGardener 老師為人師表，做乜咁負能量？
「大家為學生啫」，是嗎？
iGardener 老師相信，負能量也是能量，推動老師面對困難，諗計仔突破盲腸，用行動解決問題，好過開口埋口「加油呀、 add oil 、💪💪」呢啲虛茫嘅正能量。
例如，iGardener 老師一月尾知道要停課，正當香港啲IT大大都忙於籌備不同的停課不停學大龍鳳講座時，iGardener 老師開始寫電郵比全世界嘅知名 edtech 公司，希望公司限時免費，幫助香港的學校解決停課的教學需要。
感激 screencastify、Kami、Peardeck、Edpuzzle、Kahoot! 等等，都是不由分說，一天半天已經答覆升級，回信中更十分關心香港的疫情。限免升級後，師生亦因此在學與教得益不少，這在 iGardener 老師眼中，就是對教學的實事。
在此 iGardener 老師呼籲大家，疫情過後，要好好「懲罰」這些有心有力的 edtech 公司。
然而，當中只有一間公司，由回覆速度至態度；由頭至尾，都是那麼「冷靜沉著」，好似只係想開新單咁，嗰間就係大家祈求天父感動放寬40分鐘的 zoom 公司。
現在 iGardener 老師將二月中同這公司代表的電郵對話，公諸同好，讓大家自行閱讀，感受一下 zoom 公司對香港因疫情停課同工的「熱情和同理心」吧！
同工，當然大家可以覺得此一時彼一時，家吓三月中有機會（人哋 zoom 暫未提及香港架）限免（聽講就嚟都復課啦）咪好囉，係咪？
同工，您心內嗰股正能量， iGardener 老師真係由外至內感受到架，仲好澎湃添！所以從唔會奢望您會了解 iGardener 老師對 zoom 第一身嘅負面主觀感受，但係您要回答以下情況係咪事實？
- 上面 zoom 多次電郵回覆，白mon黑紙，拒絕老師嘅明確請求，是否客觀事實？。
- 二月臺港澳停課時，這公司只主動提供免費超過 40 分鐘給 zoom.com.cn，是否客觀事實？
- 今天三月美國疫情有需要，這公司主動提供免費給 zoom.us 及指定地區（暫未見香港架），是否客觀事實？
凡事正能量嘅人，當然會呼籲香港學校照樣填表先，盼望 zoom 受眾生精誠所至之情感動，恩澤香港，賜我地都可以跟外國一樣，有免40分限時啦！
相信洪七公一生受過不少愛心人仕的幫助，有骨氣嘅七公，會選擇抬起頭接受幫助，定係跪喺度求幫助？
假如有人要洪七公等好耐，最後，仲要食其他人隻碟漏出黎嘅野食，七公願意接受嗎？
親愛的同工們，假如您是洪七公，請問您會點樣選擇？